Ydy o’n Rhannu? Sut y gallwch chi wybod yn gyflym a yw un rhif yn rhannu yn union i rif arall, gan adael dim yn weddill? Er enghraifft, a wnaiff 3 rannu yn union i 2,169,252? Wel, faswn i ddim wedi sôn am y peth heblaw ‘mod i’n gwybod am dric... Rhannu efo 2 Dim byd i synnu ato yma. Mae unrhyw rif sy’n gorffen efo 0,2,4,6 neu 8 yn ranadwy efo 2. Rhannu efo 3 Adiwch ddigidau y rhif. Os yw’r cyfanswm yn union ranadwy efo 3, yna mae’r rhif hefyd. Felly, a wnaiff 3 rannu’n union i 2,169,252? Gwnaiff, oherwydd mae cyfanswm y digidau yn 27. Rhannu efo 4 Os yw 2 ddigid olaf rhif yn 00 neu os ydynt yn ffurfio rhif 2-ddigid sy’n rhannu’n union efo 4, yna mae’r rhif ei hunan yn ranadwy efo 4. Beth am 56,789,000,000? 00 yw’r ddau ddigid olaf, felly mae’n rhanadwy efo 4. Beth am drio 786,565,544. 44 yw’r ddau ddigid olaf, maent yn rhanadwy efo 4, felly ydy, mae’r rhif yn rhanadwy efo 4. Rhannu efo 5 Mae unrhyw rif sy’n gorffen mewn 0 neu 5 yn ranadwy efo 5. Digon hawdd. Rhannu efo 6 Mae’n rhaid i’r rhif fod yn eilrif. Os nad ydy o, anghofiwch o. Fel arall, adiwch y digidau i weld os yw’r cyfanswm yn union ranadwy efo 3. Os ydy o, mae’r rhif yn union ranadwy efo 6. Beth am drio 108,273,288. Cyfanswm y digidau yw 39 sydd yn rhannu’n union efo 3 i wneud 13, felly mae’r rhif yn union ranadwy efo 6. Rhannu efo 7 Yn wreiddiol doeddwn i ddim yn gwybod am ddull rhannu efo 7 nes i mi ei ddarganfod ar y Rhyngrwyd. Felly, mae’r adran hon yn gyflawn. Lluoswch y digid olaf efo 2. Tynnwch yr ateb hwn o’r digidau sydd ar ôl. A yw’r rhif sydd gennych yn awr yn union ranadwy efo 7? Os ydy o, dwedwch hwre. Triwch 364. Y digid olaf, 4, wedi ei luosi efo 2 = 8. Y digidau sydd ar ôl, 36, tynnu 8 = 28. Y tro diwethaf i mi edrych, roedd 28 yn union ranadwy efo 7, ac felly mae 364 hefyd. Rhannu efo 8 Os yw 3 digid diwethaf y rhif yn 000 neu os ydynt yn ffurfio rhif 3-digid sydd yn union ranadwy efo 8, yna mae’r rhif ei hunan yn ranadwy efo 8. Beth am drio 56,789,000,000? 000 yw’r tri digid olaf, felly mae’n ranadwy efo 8. Trïwch 786,565,120. Mae’r tri digid olaf,120, wedi rhannu efo 8 yn gwneud 15, felly ydy, mae’r rhif cyfan yn ranadwy efo 8. Rhannu efo 9 Cyfansymiwch ddigidau’r rhif. Os ydyw’n rhannu efo 9, dyna chi! Rhannu efo 10 Mae unrhyw rif sy’n gorffen mewn 0 yn union ranadwy efo 10. Allwch chi ddod o hyd i batrwm ar gyfer 11, 12 a 15? Anfonwch eich ateb atom.
|
