Senghennydd

Ar 14 Hydref 1913, ffrwydrodd yr aer ym mhwll glo'r Universal yn Senghennydd. Saethodd fflamau ar hyd y lefelau dan ddaear ac i fyny'r siafft i wyneb y lofa. Bu'r timau achub yn ymladd y tân, y mwg a'r nwy a'r cwympiadau am wythnosau ac yn y diwedd cafwyd bod 439 glöwr wedi'u lladd ac un aelod o'r timau achub. Hon oedd y ddamwain waethaf yn hanes cloddio am lo yng ngwledydd Prydain. Roedd gan bob un bywyd a gollwyd stori i'w hadrodd. Weithiau, gall y ffigyrau beri inni golli golwg ar yr unigolion a'r teuluoedd oedd yn cael eu taro gan y colledion. Stori un o'r bywydau a gollwyd sydd yn y faled hon.